ایس پی صدر اکھلیش یادو پہنچ گئے ہلدوانی 

ہلدوانی۔ اتر پردیش کے سابق وزیر اعلی اور ایس پی کے قومی صدر اکھلیش یادو اتوار کو ایک شادی کی تقریب میں شرکت کے لیے ہلدوانی پہنچے۔ اس دوران انہوں نے اتراکھنڈ حکومت پر حملہ کرتے ہوئے کہا کہ جوشی مٹھ کو منافع کے حصول میں برباد کر دیا گیا ہے۔ گھوٹالوں کے بارے میں کہا کہ ریاست جتنی چھوٹی ہے، یہاں اتنے ہی زیادہ گھوٹالے ہو رہے ہیں۔ اکھلیش یادو ایس پی کے ریاستی انچارج متین صدیقی کے بیٹے حسن صدیقی کی شادی کے پروگرام میں شرکت کے لیے ہلدوانی پہنچے۔ دوپہر میں نینی تال روڈ پر ایک بینکوئٹ ہال میں منعقدہ پریس کانفرنس میں اکھلیش نے کہا کہ جوشی مٹھ کو لے کر کئی رپورٹیں آئی ہیں۔ سائنسدانوں نے جوشی مٹھ اور خاص طور پر این ٹی سی پی پراجکٹ میں تعمیراتی کام سے منع کیا تھا، اس کے باوجود اس پراجیکٹ کو نافذ کیا گیا۔ انہوں نے کہا کہ چاہے بی جے پی ہو یا کانگریس دونوں کا رویہ جوشی مٹھ کے تئیں ایک جیسا ہے۔ بی جے پی اور کانگریس نے منافع کے نام پر جوشی مٹھ کو برباد کر دیا ہے۔ اس دوران ایس پی کے قومی ترجمان راجندر چودھری، ریاستی انچارج متین صدیقی، ایم ایل اے عطا الرحمن، ایم ایل اے نواب جان، ایس پی لیڈر جاوید صدیقی، سلطان بیگ وغیرہ موجود تھے۔